Mahigit siyam na libong residenteng apektado ng pagbaha sa Cluster 1, 2, at 3 ng Pikit at Midsayap na kinasasakupan ng BARMM Special Geographic Area o SGA ang nakatanggap ng tig-25 kilo ng bigas mula sa Ministry of Social Services and Development (MSSD) noong ika-29 ng Nobyembre hanggang ika-1 ng Disyembre ngayong 2021.
Lubog sa baha ang mga tirahan ng mga nasabing residente. Ito ang naging resulta ng sunod-sunod na pag-ulan noong mga nakalipas na araw.
Mga magsasaka at mga pamilyang may maliliit na kita ang mga residenteng nakatanggap ng nasabing tulong na kung saan ay 7, 492 ang mula sa Pikit at 1, 939 naman ang sa Midsayap.
Samantala, magsasagawa pa rin ng monitoring ang MSSD SGA Provincial Office sa sitwasyon ng mga residente upang makapagbigay ng agarang tulong kung sakaling hindi pa rin humupa ang pag-ulan ng malakas.
Magpapatuloy ang distribusyon ng bigas sa ibang munisipyong sakop ng BARMM SGA hanggang ika-9 ng Disyembre nitong taon.
(Photos from MSSD BARMM Special Geographic Area)
